تعارف جامعہ برکات حرم

دارالعلوم جامعہ برکات حرم ، شمالی ہند کی ریاست اترپردیش کے مغربی ضلع مرادآباد میں واقع اھل سنت وجماعت کا ایک عظیم دینی ادارہ ہے اس کی سنگ بنیاد 6 دسمبر 2008 ء کو ملک کے مشاہیر علماء اور مشائخ کی موجودگی میں رکھی گیٔ

علاقے میں پھیلی جہالت اور تعلیمی پسماندگی کو دیکھتے ہوۓ علامہ مفتی محمد اصغر علی مصباحی صاحب کے تڑپتے دل نے یہ محسوس کیا کہ یہاں ایک ایسا دینی، روحانی، اور تربیتی ادارہ قائم کیا جائے، جہاں سے علم کی روشنی پھوٹے، رشدوہدایت کا چراغ روشن ہو، جس کے ذریعہ جاہلانہ رسم و رواج کا خاتمہ اور تعلیمی پسماندگی دور کی جاسکے ، چنانچہ نہایت ہی بے سروسامانی کے عالم میں علامہ مفتی محمد اصغر علی مصباحی ثقافی صاحب نے اللہ تعالیٰ پر توکل اور بھروسہ کر کے 2008 ء میں اس ادارہ کی بنیاد ڈالی، جو بظاہر جھونپڑی تھی؛ لیکن اخلاص و للہیت اور تقویٰ و طہارت پر قائم، اس جھونپڑی کا رشتہ دار ارقم، مسجد نبویﷺاور اصحاب صفہ سے جڑ گیا، ساتھ ہی ساتھ مخلص اور ہمدرد مشیروں کی ہمنوائی بھی حاصل ہوئی، جس کا نتیجہ یہ ہوا کہ دیکھتے ہی دیکھتے یہاں علم کی ایسی شمع روشن ہوئی، جس نے صرف اس گاؤں بلکہ پورے علاقہ کو منور کر دیا، چنانچہ ہزاروں نو نہالان امت اس ادارہ سے علم حاصل کرکے ملک کے ہر گوشے میں تعلیمی و تدریسی خدمات انجام دے رہے ہیں۔

حفظ مع تجوید و مدنی قاعدے کے مشق کے ساتھ ساتھ الجامعة الاشرفیہ کے نصاب کے مطابق پرائمری اول تا ہشتم اور اعدادیہ تا فضیلت معیاری تعلیم دی جاتی ہے، یہاں تعلیم و تربیت کے لیے ماہر، جید اور محنتی اساتذہ کرام کی خدمات حاصل ہیں، اساتذہ پوری مستعدی اور پابندی کے ساتھ درس و تدریس کا فریضہ انجام دیتے ہیں، تعلیمی نظام کو چست و درست رکھنے کے لیے سال میں عمومی طور پر دو امتحانات ہوتے ہیں، نیز ہر ماہ تعلیمی جائزہ بھی ہوتا ہے۔

مدرسہ ھذا میں ہر جمعرات کو انجمن تعمیر انسانیت کے نام سے موسوم ایک علمی و فنی اجلاس کا انعقاد بھی ہوتا ہے جس کے سائبان تلے طلبہ کی صلاحیتیں پروان چڑھتی ہیں ، استعدادیں نکھرتی ہیں ، ان میں مافی الضمیر کے ابلاغ و ترسیل کا ڈھنگ اور سلیقہ آتا ہے ، اپنی زبان و بیان کی تراش و خراش کے مواقع حاصل ہوتے ہیں ، اور ان کے اندر جرأت و بیباکی پیدا ہوتی ہے۔
الحمد للہ ! یہ ادارہ روز افزوں اپنے مقصد میں شاہراہ ترقی پر گامزن ہے، اس وقت دارالاقامہ میں مقیم طلبہ کی ایک کثیر تعداد حصول علم مشغول ہے نیز ادارے میں خدمات دینے والے اساتذہ کی بھی ایک بڑی تعداد ہے ہر سال طلبہ کی تعداد میں اضافہ ہی ہورہاہے